Nasunogan pabutanga'g portable toilet

CEBU, Philippines - Ang mga tinugyanan sa Department of Health (DOH) mimando sa lokal nga kagamhanan sa dakbayan sa Mandaue nga pataoran og mga portable toilet ang lugar nga nasunogan sa sitio Aroma barangay Subangdako dakbayan sa Mandaue aron masanta ang pagsulbong sa sakit nga hilanat sa mga nabiktima sa sunog. Ang maong mando gihimo ni Dr. Expideto Medalla sa DOH 7 human niya mabisitahe ang maong lugar ug nasud-ong ang hilabihan katalandugon niini gumikan kay walay mga pansayang kalabayan sa ilang hugaw sa lawas.

Matud pa ni Medalla nga gawas sa kahugaw sa palibot, nakatampo usab sa pagsulbong sa mga balatian sa panglawas sa katawhan ang kainit sa panahon.

Hinuon gipabahaan karon sa kagamhanan og mga tambal sa hilanat, diarrhea ug uban pang matang sa sakit ang mga nabiktima sa sunog aron nga makalahutay ang lawas niini nga dili dayon hidutlan sa nagkalainlaing matang balatian sa panglawas.

Gawas sa mga portable toilet, gipanarokan usab og mga tolda ang maong lugar aron nga dili kaayo mapagba sa kainit sa adlaw ang mga biktimang nawad-an sa ilang panimalay kay gilamoy sa kayo niadtong Martes.

Sa laing bahin, si Kapitan Walter Ati Dy sa Subangdaku mimando sa mga nabiktima nga nawad-an og mga balay nga papangitaon sila og mga kapuy-an sa luwas nga lugar, apan nangatarungan kini nga nabalaka sila nga bawion na sa tag-iya ang luna nga ilang gipuy-an, hinungdan nga mipilit sila sa maong dapit bisag nagkagidlay na ang ilang kahimtang. – BANAT NEWS