Mag-uuma gipusil kritikal

CEBU, Philippines - Talandugon ang kahimtang sa usa ka mag-uuma human kini pusila sa wala hiilhing kriminal samtang naghipos   sa iyang kabaw didto sa sitio Guinabinhan, barangay Arpili, lungsod sa Balamban niadtong Huwebes sa gabii.

Ang biktima mao si Mariano Lasponia, 61, minyo, ug mag-uuma sa Arpili.

Si PO2 Manuel Gilamon Jr. sa Balamban Police Station, mibutyag sa Banat News  nga ang biktima mao pay pag-abot sa ilang balay nga nagkuha sa kabaw niyang gitugway sa kasagbotan dili kaayo halayo sa ilang balay.

Matud pa ni Gilamon nga wala makabantay ang biktima nga may nag-atang diay'ng kriminal kaniya diha sa ilang balay busa pag-abot niya sa tugkaran wala pa siya makasulod sa balay kalit siyang nakadungog og buto sa armas.

Gumikan sa kabanhod sa iyang tiyan iya kining gihiling apan ang daghang dugo sa walang bahin niini maoy iyang nasinatian gikan sa samad sa bala nga wala hisayri ang kalibre.

Gidali siya paghatod sa tambalanan sa dakbayan sa Sugbo aron katambalan dayon samtang padayon pang gisuta sa kapolisan kinsay miluthang sa biktima. – BANAT NEWS