Cocaine pahugtan pagbantay

CEBU, Philippines - Ang mga pasilidad sa gobyerno sama sa pantalan sa barko ug tugpahanan sa eroplano gihigpitan na sa pagbantay aron kalikayan ang pagsulod sa mga kontrabando lakip na ang   ilegal nga drugas  sama sa shabu ug cocaine.

Mao kini ang dakong butang nga gihisgutan sa usa ka komperensya nga gipahigayon kagahapon didto sa buhatan sa Bureau of Customs nga gitambungan ni Undersecretary Paul Clarence Oaminal kinsa kasamtangang OIC sa Dangerous Drugs Board (DDB), Cebu Customs District Collector Ronie Selvestre, Regional Director Randy Pedroso sa Philippine Drug Enforcement Agency (PDEA) ug mga opisyal sa Philippine Coast Guard ug sa Maritime Industry Authority.

Mitambong usab sa maong panagtagbo ang chairman sa DDB ug kandidato pagka-senador Vicente “Tito” Sotto III kinsa misugyot usab sa pagpalig-on sa Barangay Anti-Drugs Abuse Council (BADAC).

Gisugyot usab niya nga pataoran og mga radar ang mga pantalan ug tugpahanan aron makapaniid dayon sa palibot kun may mga palusot nga   illegal mga drugas.

Usa sa nabalak-an ni Sotto mao ang nasakmit nga mga cocaine didto sa Davao City ug sa Borongan Eastern Samar sa miaging buwan sa dakong kalagmitan nga nakasulod na kining maong matang sa drugas dinhi sa nasud.

Si Usec. Oaminal maoy misugyot nga aron mapiho ang hinugtanay pagtinabangay sa mga kadagkoan sa nagkalainlaing ahensya sa kagamhanan ilabi na sa taga pantalan ug tugpahanan ug uban pang ahensya sa kagamhanan, kinahanglang mopirma sila og usa ka kasabutan alang niini. – BANAT NEWS