Notadong 'manghilabot' napusilan

CEBU, Philippines - Usa ka gipasanginlang notadong kawatan ang napusilan sa usa ka polis nga gisuwayan unta niini pagdunggab human nasakpang nangawat og mga construction materials sa dalan Abellana barangay Guadalupe pasado alas-3 sa kaadlawon kagahapon.

Si Jonros Cuizon, 18, taga sitio Mahayahay barangay Calamba ang nakaangkon og samad pinusilan sa iyang walang paa human pusila ni PO2 Dennis Labra nga nadestino sa Guadalupe Police Station.

Base sa inisyal nga imbestigasyon sa kapolisan nasayran nga nag-roving si Labra luwan sa iyang motor sa nahisgutang lugar dihang iyang nabantayan ang batan-ong bag-ohay lang migawas sa usa ka building nga wala pa mahuman nga nagbitbit og dakong knapsack ug pipe threader.

Tungod sa iyang pagduda sa linihokan niini iya kining giduol ug nagpaila siyang polis apan sa kalit lang midiretso kini og dunggab kaniya.

Si Labra swerteng nakalikay ug daling nakaibot sa iyang armas dayong pusil sa tiil sa suspek, dihang nalup-og gidakop niya kini ug gidala sa Cebu City Medical Center.

Dihang gisusi ang sulod sa gidala niining bag nasutang duna kini duha ka Nokia cellphone, upat ka strainers; usa ka showerhead; duha ka botelyang rugby; 10-teflon tapes; duha ka quarts ug lima ka latang pintal, ug ang pipe threader nga nagkantidad tanan og dul-an P30 mil ingon man ang siyam ka pulgadas nga double blade hunting knife.

Samtang usa ka Randy Amorado nga maoy timekeeper sa gihimong building mibutyag sa kapolisan nga siya maoy tag-iya sa cellphone nga gikuha sa suspetsado. Gikatahong diha kini miagi sa ilang bintana nga gipugos og guba.

Sa pakighinabi sa Banat News ni Sr. Insp. Mario Monilar, hepe sa Guadalupe Station nagkanayon nga on-duty pa si Labra atol sa hitabo, samtang si Cuizon nalambigit na kanunay sa mga kaso sa pagpangawat sa ilang dapit. -  BANAT NEWS