Cris Saavedra nangangkong 101 porsiyentong modaog

CEBU, Philippines - Ang whistleblower nga si Crisologo Saavedra kinsa mikandidato pagkamayor sa dakbayan sa Sugbu nangangkong 101 porsiyentong modaog siya sa umaabot nga piniliay.

Si Saavedra sa roundtable discussion sa The Freeman kagahapon sa hapon nagkanayon nga ang iyang pagwadwad sa kurapsyon dinhi sa Sugbu maoy dakong puntos nga natanom na sa kasing-kasing sa mga Sugbuanon.

Nahimong iladong personahe si Saavedra sa Sugbu gumikan sa gibutyag niining ‘overpriced’ nga pagpamalit sa mga lampposts nga gigamit sa pag-adorno sa kadalanan alang sa 12th Association of South East Asian Nation, ang maong kaso batok sa mga opisyales nasang-at na sa korte.

Matud pa ni Saavedra nga kung siya maoy mahimong mayor tangtangon niya ang tanang kurapsyon sa gobiyerno tungod kay iyaha kining adbokasiya.

Si Saavedra nga kaalyado ni kanhi presidente Joseph Estrada kinsa nakombikto sa kasong plunder nagkanayon nga daghang mga kabus padayong misuporta kang Estrada.

Gibutyag usab niini nga dili siya modawat og mga hinabang gikan sa mga tawo lakip na sa mga negosyante tungod kay dili siya gustong mahigot sa utang kabubut-on, matud pa niya si Estrada maoy mihatag og budget alang sa iyang makinarya.

Matud niini nga usa sa iyang tumong usab sa pagkandidato mao ang pagputol sa political dynasties sa Sugbo sa mga Osmeña ug Garcia kansang mga anak mao ray nagpuli-puli og hawid sa renda sa pangagamhanan sa Sugbu.  - Brenda Batuto (BANAT NEWS)