Amerkano nag-wild sud sa Abyon

CEBU, Philippines - Usa ka 80-anyos nga Amerkano ang nag-wild sulod sa gisakyang abyon gikan sa Manila padulong dinhi sa Sugbu kagahapon ug nakamugna og kalisang sa mga pasahero human ma-damage ang bintana sa abyon sa gihimo niini.

Ang maong langyaw kinsa gidakop sa mga sakop sa Police Center for Aviation Center giilang si Rex Maybert Hampton ug gikustodiya karon sa maong buhatan samtang nagpaabot og kasong ipasaka.

Sumala pa sa gipadalang pamahayag sa Corporate Communications Department sa Philippine Air Lines dinhi sa Banat News nga kauban ni Hampton ang Cebuana nga asawang si Jovelyn sa maong biyahe luwan sa PAL Flight PR843.

Samtang naglupad pa ang abyon gikatahong nagkalalis si Hampton ug Jovelyn ug diha-diha nagsugod na og panghasi ang maong langyaw hinungdan nga ang mga cabin crew ug pipila ka pasahero mitabang sa pagpugong kaniya.

Usa sa mga pasahero nga giilang si Oscar Surban naangol atol sa komosyon samtang ang window pane sa abyon naguba human pusposi sa maong langyaw sa iyang sungkod.

Diha lang napugngan ang langyaw dihang gitabangan og hawid sa mga pasahero ug cabin crew hangtud nga nakatugpa diha sa Mactan Cebu International Airport.

Tungod sa kagubot ug sa kapeligro sa sitwasyon daling mi-radyo ang mga pilotong sila si Capt. Jesus Garcia ug First Officer Rommel Gideon Enriquez nga nangayo og assistance sa Cebu' PCAS-7.

Gipasalig hinuon sa mga piloto sa mga nabalakang pasahero nga wala mahimutang sa kakuyaw ang abyon tungod sa gihimo ni Hampton ug luwas silang nakatugpa sa destinasyon kagahapon sa tukmang eskedyul.

Dihang mitugpa ang abyon diha sa MCIA gisikop dayon si Hampton sa PCAS-7 ug gitanggong sa ilang karsel samtang giandam pa ang kasong posibleng ipasaka batok kaniya. Si Surban daling gidala sa PAL Clinic.

Samtang diha sa PCAS-7, si Sr. Supt. Joselito Salido ang director sa maong buhatan mibutyag sa mga tigbalita nga gikatahong dunay gitumar nga medikasyon si Hampton alang sa iyang balatian sumala pa sa kapikas niini nga maoy nakaingon sa pagkainiton niini og ulo.

Sumala pa sa pamahayag sa PAL gikatakda nilang pasakaan og kaso si Hampton sa paglapas niini sa Civil Aviations Authority of the Philippines Laws ug sa danyos nga gihimo niini sa abyon nga nagbutang sa peligro sa mga pasaherong nagbiyahe niadtong tungura.

Ang abyon subling nakabiya sa tukma gihapong eskedyul balik sa Manila human sa hitabo kagahapon.  – BANAT NEWS