Shotgun mibuto; tulo naangol

CEBU, Philippines - Tulo ang nasamdan sa kalit nga pagbuto sa shotgun sa usa ka gwardiya pipila ka minutos human mi-alarma sa usa ka tawong nanghasi diha sa ilang gasoline station sa V. Rama Ave. sa barangay Guadalupe sa milabay'ng gabii. Ang nasamdan mao ang duha ka pump attendants nga sila Saturnino Tantiado, 21, Boyledo Avenido, 21, stay-in worker ug ang kostumer nilang si Leopoldo Lee Agdepa III, 29, usa ka computer programmer, nga taga sitio Areos barangay Sapangdaku.

Boluntaryo hinuong mitahan sa kapolisan ang gwardiyang si Anecito Cahayagan, 29, sakop sa Royal Knight Security Agency nga nagbase sa barangay Carreta.

Sa pakighinabi sa Banat News ni PO3 Dario Manatad sa Homicide Section mibutyag kining mikasa sa iyang shotgun ang gwardiya tungod sa tawong mihasi sa ilang gasolinahan, apan pagkakita sa maong tawo mikaratel kini og dagan.

Apan nalimtan sa gwardiya pagbalik niya sa iyang pwesto nga ‘loaded’ pa ang iyang armas ug wala niya kini mabutang sa ‘safe mode’ ug aksidenteng nakablitan. Ang mga bolitas adto napunta sa mga pump attendants ug sa kostumer nga nagpatubil.

Si Cahayagan mitahan sa iyang 12-gauge shotgun ngadto sa mga polis. Kasong reckless imprudence resulting to multiple injuries ang gikatakdang ipasaka batok sa maong gwardiya.  – BANAT NEWS