CEBU, Philippines - Usa ka ginang ang namatay ug laing usa ang naangol dihang gipamusil sa upat ka armadong lalaki samtang naglingkod gawas nga bahin sa usa ka tindahan sa sitio Bhukyol barangay Poblacion-3 siyudad sa Carcar niadtong Domingo sa alas 8:40 sa gabii.
Ang biktima nga namatay paghiabot sa tambalanan dinhi sa dakbayan sa Sugbo mao si Josephine Mamae Basillote, 36, molupyo sa nahisgutang lugar. Samtang ang naangol mao si Eusebio Basillote, 62, nagpuyo gihapon sa maong dapit.
Samtang ang mga suspek mao sila si Joseph Laog-Laog, Jerome Florita, Bar Rafols ug ang ikaupat nga wala pa mailhi ang pangalan apan molupyo sa barangay Awayan, Carcar.
Matud pa ni PO1 Gilmer Noval sa Carcar Police dihang nahinabi sa Banat News ang upat ka mga suspek sakay og motorsiklo nga miabot sa dapit ug nangita sa usa ka gihinganlan og Eric dihang walay nakatubag, gipamusil sila niini.
Si Eusebio naigo sa tuong bahin sa paa samtang si Josephine naigo sa nagkadaiyang parte sa kalawasan. Ang duha gidala sa Carcar District Hospital apan gibalhin sa tambalanan dinhi sa dakbayan sa Sugbo si Josephine, apan sumala pa sa mga polis nakabsan kini sa kinabuhi.
Sa gihimong follow-up operation sa kapulisan gitumbok sa igsuon sa biktima nga si Roben Basillote ang mga suspek nga sila si Laog-laog, Florita ug Rafols apan wala pa matumbok ang ika-upat nga kauban niini.
Hinuon nasikop sa hot pursuit operation sa kapulisan ang suspek nga si Laog-laog kagahapon sa buntag sa pinuy-anan sa barangay Awayan samtang padayon pa ang kapolisan pagtino sa motibo sa pagpamusil. (BANATNEWS)