Gipusil sa Bloods namatay

CEBU, Philippines - Patay ang usa ka 16-anyos human pusila sa usa ka giingong sakop sa Bloods sulod sa usa ka videokehan sa barangay Basak dakbayan sa Lapulapu kagahapon sa kaadlawon. Ang biktima mao si Hero Escana, 16, nagpuyo sa Deca Homes Phase 1 sa Agus, Basak dakbayan sa Lapulapu samtang wala pa mailhi ang mamumuno niining gidudahang miyembro sa Bloods gang.

Sa pasiunang imbestigasyon ni SPO3 Rex Ibanez sa Crime Against Persons desk sa kapolisan sa dakbayan sa Lapulapu nasayran nga mga 12:35 kagahapon sa kaadlawon nakig-inom si Escana sa iyang mga silingang sila si Abel Bunag, 21, ug Jun Nerosa, 26, sa usa ka videokehan duol sa usa ka mall sa maong dapit.

Pipila ka gutlo migawas si Escana sa maong videokehan aron sa pagtubag sa sugo sa lawas, apan kalit kining gisundan sa wala mailhing tawo ug mipusil sa ulo niini.

Patay diha-diha si Escana ug wala na madala sa tambalanan samtang wala na maabti ang gikatahapan.

Matu pa ni Lapulapu City Police Office Director Sr. Supt. Mariano Natu-el Jr. nga ang mga station commanders kasamtangan nang nagpahigayon og pamaagi sa pag-ila sa tanang mga miyembro og gangs ug fraternities sa ilang mga hurisdiksyon. (Bong Soriano)   (BANATNEWS)