Taxi gipunggit 4 angol

CEBU, Philippines - Upat ka mga tawo ang nangaangol lakip duha ka bata human mapunggit ang usa ka taxi sa 10-wheeler truck diha sa pedestrian crossing sa Cebu South Coastal Road sa Carmen Village sa dakbayan sa Talisay.

Giila ni PO2 Aquiles Cabando, usa sa mga mirespondeng sakop sa Traffic Division sa Talisay ang mga nangaangol mao ang drayber sa Hanori Taxi nga si Raymundo Sosas ug mga pasahero niining sila si Analy Bas,13, Arlene dela Cruz ug anak niining si Gerald dela Cruz, 5-anyos, pulos mga taga barangay Cansojong dakbayan sa Talisay.

Sumala pang Cabando sa pakighinabi sa Banat News nga nagtadlas sa coastal road ang trak de kargang gimaneho ni Alexander Espragera gikan sa dakbayan sa Sugbu padulong sa habagatang bahin.

Samtang ang taxi gikan sa barangay Tabunok padulong ngadto sa Poblacion, Talisay ug sa pagtabok niini   kalit kining gisungag sa maong trak.

Tungod sa gidak-on ug kakusog sa impact maayong pagkagusbat sa maong taxi nga nakaingon sa pagkaangol sa mga sakay niini. Si Sosas daling gidala sa South General Hospital samtang ang mga pasahero niini gidala ngadto sa Chung Hua Hospital.

Kasamtangang gitanggong sa karsel sa kapolisan ang drayber sa trak samtang nagpadayon pa ang imbestigasyon sa hitabo. (BANATNEWS)