Temperatura sa rehiyon mosaka pa

CEBU, Philippines - Mipasidaan ang Philippine Atmospheric, Geophysical and Astronomical Services Administration (PAGASA) sa publiko nga mas moinit pa ang temperatura nga masinati dinhi sa Sugbo sa umaabot nga mga adlaw.

Sumala pa ni Oscar Tabada, ang Regional Division Chief sa Pagasa-Visayas nga masinati ang tumang kainit sa panahon sugod karong Marso hangtud sa buwan sa Mayo.

Gibutyag usab ni Tabada nga tungod kini sa epekto sa El Niño, diin posibleng malabwan ang labing taas nga temperaturang natala dinhi sa Sugbo niadtong Mayo 31, 1979 nga miabot og 37 degrees Celsius.

Nagkanayon usab si Tabada nga ang lalawigan sa Bohol maoy makasinati og labing init nga panahon dinhi sa rehiyon.

Samtang ang mga nasinating uwan dinhi sa Sugbo sa miaging buwan kuwang pa aron hingpit nga makatuhop sa ilawom sa yutang nangaliki tungod sa kauga niini bunga gihapon sa huwaw.

Samtang si Engr. Astrophel Logarta, ang Department Manager sa Production and Distribution Department sa Metropolitan Cebu Water District (MCWD) atol sa tulomanong Dialogue on the Air sa DySS mipasalig nga duna pa gihapoy paigong suplay sa tubig dinhi sa Sugbo.

Sukwahi sa ubang mga lugar sa nasud diin anam-anam na nga nagka-ubos ang water level sa tinubdan sa ilang tubig naapektahan na ang suplay sa ilang water systems.

Si Logarta miingon nga daghang mga kakuhaan og tubig ang MCWD ilabi na ang gikan sa mga atabay. Gawas pa sa mga atabay, nagkuhaan usab og tubig ang MCWD sa water reservoir sa Buhisan Dam, ang maong tinubdan gikabalak-an na usab nga moubos og maayo ang level tungod sa huwaw.

Ang maanindot nga kasayuran nga gipaabot karon sa MCWD mao nga bisan paman sa mga nasinating huwaw karon ug gipaabot nga modako ang konsumo sa tubig dili sila mopaumento sa presyo niini.

Si Edna Inocando, ang Officer-in-Charge sa Public Affairs Department sa MCWD nga dili sila maka-diretso pagpasaka sa singil sa ilang tubig tungod kay mag-agi pa kini og public hearing ug mananghid pa usab sila sa Local Water Utilities Administration sa kaulohan.

Giawhag usab ni Logarta ang Department Manager sa Production and Distribution Department sa MCWD ang mga konsumidor nga ilisan dayon og bag-o ang gubaong metrohan sa tubig aron dili modako ang ilang bayranan. – BANAT NEWS