16-anyos gipaum-om sa pusil gitipi, uyab nga 16-anyos gi-gangrape

CEBU, Philippines - Usa ka 16-anyos nga lalaking sakop sa Crips gang gipusil patay samtang uyab niini gilugos sa gidudahang unom ka kaubang sakop gihapon sa ilang gang diha sa sitio Carmelite, sa barangay Buaya dakbayan sa Lapulapu kagahapon sa kaadlawon. Sumala pang SPO2 Frederick Eslit, sa Crime Against Persons Desk mibutyag nga ang gipatay mao si Russel Booc,16, ug ang 16-anyos nga uyab niining taga barangay Bangkal parehong sakop sa Crips gang samtang gisugdan na pagpangita ang mga gikatahapan.

Matud pang Eslit, alas-2 kagahapon sa kaadlawon gikan nagpalit og burger ang duha sa maong dapit ug sa pagbalik nila sa agi, unom ka mga batan-ong gidudahang kauban ra usab nila sa Crips gang base sa (scarf nga blue nga simbolo sa ilang grupo) ang miatang kanila dayong mition og armas. 

Ang duha gidala sa usa ka hilit nga dapit sa maong lugar ug diha gikatahong gipaum-om sa mga gikatahapan sa sumbohan sa armas ang baba sa babaye samtang gipuli-pulihan og lugos.

Gikatahong human sa unom sa ilang paglugos, gimandoan sa mga gikatahapan ang namatay’ng biktima nga lugoson ang uyab niini apan gikatahong mibalibad kini, butang nga gikasuko sa grupo ug diha-diha gikatahong gikulata kini ug gipusil sa ulo hinungdan sa hinanali niining kamatayon.

Human sa maong insidente daling mipahilayo sa maong dapit ang mga gikatahapan ug biyaan ang mga biktima.

Si Eslit nagdudang gipaum-om sa armas ang batan-ong gipatay dihang gipusil gumikan kay wala sila’y nakitang entrada sa bala sa ulo sa biktima gawas lang sa “exit wound” diha sa ulo niini.

Ang mga sakop sa ERUF mideklarar nga patay na si Booc atol sa ilang pagresponde, samtang ang 16-anyos nga babaye gidala kini sa kapolisan ug giduso sa Women’s and Children’s Desk alang sa dugang imbestigasyon ug sa pagpahiling.

Hangtud ning pagbalita blangko pa ang kapolisan sa pag-ila sa responsable sa maong krimen diin gihulagway ni SPO2 Eslit nga posibleng nagkaunay lamang ang maong grupo gumikan sa love triangle.  - Bong Soriano  ( BANAT NEWS)