Kasong Diamante nakapaukay sa Tuburanon

CEBU, Philippines - Naukay ang mga Tuburanon human mamantala sa lokal nga pamantalaan sa dakbayan sa Sugbo nga ang kandidato pagka mayor ubos sa Liberal Party nga si magpapatigayon Democrito Diamante Jr. nag-atubang og sumbong smuggling sa hukmanan sa Dakbayan sa Lapu-Lapu.

Ang mga dumadapig ni Diamante mitawag sa Banat News ug mireklamo mahitungod sa paggawas sa taho kabahin sa kaso nga giatubang sa maong negosyante

Apan daghan usab nga mga mulopyo nga mipadayag og kalipay nga nasayod sa pagka tawo ni Diamante nga taud-taod nga nawala sa lungsod sa Tuburan ug pagbalik niini usa na ka adunahan.

Usa ka Tuburanon mitug-an sa Banat News nga kining kaso ni Aljun Diamante dili maukay sa publiko kun wala pa siya mudagan sa pagka- mayor.

Hinuon matud pa sa maong Tuburanon nga labing nasayran sa mga Tuburanon ang katibuk-ang pagklatawo ni Diamante tungod sa mga leaflets karong gisabwag didto bahin sa pagkatawo niya.

Si Diamante gipasakaan og duha ka kaso sa hukmanan human   masakmit sa mga otoridad ang mga relo nga gipatuong mga electrical parts nga nagkantidad og 12,800 yen kon P7 milyones nga ipayuhot unta sa tugpahanan sa Mactan kun wala pa hisakpi sa mga tinugyanan sa Bureau of Customs dul-ang napulo na ka tuig ang milabay.   (Pepe Sollano)   (BANATNEWS)