COMELEC way mahimo sa pulong-pulong

CEBU, Philippines - Giangkon sa Commission on Election nga wala silay mahimo niining mga gipahigayong pulong-pulong sa mga kandidato sa lokal nga posisyon bisan paman og klaro na kaayong sayo kini nga pamaagi sa pangampanya sa umaabot nga presidential ug lokal nga elecion sa bulan sa Mayo.

 Matud pa ni Provincial Election Supervisor Atty. Lionel Marco Castillano makahimo sila og dali nga lakang batok sa kandidato apan ilaha nang napanglantawang ang irason sa mga kandidato nga mipahigayon lang sila og voter’s education.

Tungod niini, si Castillano miingon nga ang ilang buhatan wala na lamang mihimo og mga lakang batok sa maong mga kalihukan sanglit wala man usab kini maesplikar sa balaod nga mahimong dakpon ug pasakaan og kaso ang kandidatong mopahigayon og voters education apan indirektang nangampanya alang sa kandidatura niini.

 Wala pa usab hinuon makadawat ang ilang buhatan og pormal nga reklamo batok sa mga politikong diskumpiyado sa gihimo sa ilang mga kaatbang. (Chester Abadilla) (BANATNEWS)