Nagtan-aw tigbakay gipusil

CEBU, Philippines - Patay diha-diha ang usa ka lalaki human kini gidul-itan pagpusil sa wala mailhing mamumuno samtang nagtan-aw og tigbakay pasado alas-5 sa miaging hapon sa barangay Cabatbatan lungsod sa Dumanjug.

Ang namatay nailhan nga si Espidito “Peddy” Decinan, 23, molupyo sa barangay Masa, wala pa mailhi sa kapolisan ang mamumuno atol ning pagsulat sa balita.

Matud pa ni SPO1 Willer Sayson nga nahinabi sa Banat News nga ang biktima nagtan-aw og tigbakay sa maong lugar dihang kalit nga giduol sa mamumuno ug walay daghang pangutana gipusil ang tangkugo niini.

Ang biktima naigo diha mismo sa iyang tingkoy ug ang bala milapos ngadto sa aping nga maoy gituohang hinungdan sa hinanali niining kamatayon.

Dugang pa ni Sayson nga posibleng atraso ug dako ang kalagot sa mamumuno ngadto sa biktima, wala usab gisalikway sa kapolisan nga posibleng dunay gikaaway ang biktima sa ilang lugar. (Lesley Caminade)   (BANATNEWS)