Lola, lolo napaig sa sunog sa Argao

CEBU, Philippines - Managtiayong lolo ug lola maoy nadugang sa mga nakalas sa mga nahitabong sunog dinhi sa Sugbu human ang ilang payag diha sa sitio Roadsides Langtad barangay Lagtang sa lungsod sa Argao naugdaw niadtong Biyernes sa gabii.

Ang mga biktimang napaig mao ang magtiayong sila si Alberto Alcazaren ug Lydia Alcazaren, gibana-banang pulos nagpangidaron na og 80 ngadto sa 90 anyos. Ang lalaking Alcazaren usa ka retiradong enhinyero.

Matud pa ni FO1 Angelito Alcarez sa Argao Fire Department dihang nahinabi sa Banat News nga gidudahan nilang ang pagdaob sa magtiayon diha sa sulod aron iabog sa lamok maoy sinugdanan sa maong kalayo.

Base sa imbestigasyon sa mga bombero, ang mga silingan miingon nga pulos na gi-ango ango ang duha ug wala usab kini mga anak nga ilang nahibaw-an.

Gikatahong nakabantay ang mga silingan sa kabaga sa aso nianang gabhiuna sa balay sa duha nga kalit misilaob hinungdan nga dali nila silang gipamukaw apan wala na makagawas ang duha.

Ang mga bombero nga miresponde mikontrolar sa kalayo human sa lima ka minutos, gibana-banang moabot sa P20 mil ang danyos sa maong nasunog nga payag nga giisa sa 1st alarm sa kabomberuhan.

Si SFO1 Kevin Rodriguez, maoy fire scene investigator mitug-an sa Banat News nga dihang naabot sila sa lugar 80 porsiyento na sa balay ang gilamoy sa kalayo sanglit naglisod sila og sulod sa lugar tungod sa kahagip-ot sa agianan.

Sumala pa ni Aladin Comaling, 28, silingan sa duha sa pakighinabi sa Banat News nga kaniadto pa nila badlungon ang duha tungod sa pagpaaso sulod sa ilang balay tungod sa peligro sa sunog.

Gikatahong ang mga karaang sinina pa sa duha maoy dauban aron kusog moaso, apan ang mga silingang tindahan di mobaligya sa duha kun mopalit og gas tungod sa kabalakang madisgrasya sila sa sunog.

Si Comaling midugang nga ang patay’ng lawas sa duha diha mapalgi sulod sa kasilyas nga nagkuptanay sa ilang mga kamot, samtang si Lydia nagkupot pa og Bibliya.

Mao na kini ang ikaduhang insidente sa sunog sa Sugbu sulod niining bulana nga mikalas og kinabuhi, ug mao nay ikatulong hitabo sulod lamang niining tuiga.

Niadtong milabay’ng Huwebes sa kaadlawon nakalas usab ang magtiayong si Atty. Manuel Pastrana,76, ug asawang si Norma,74, ingon man ilang katabang nga giilang si Joy dihang gilamoy sa kalayo ang ilang ancestral house sa Banawa, barangay Guadalupe.

Sa milabay’ng bulan sa Pebrero, nakalas usab ang manag-amahang Rolando Caberte, 63, usa ka retiradong manager sa Philippine Air Lines; ug anak nga si Maria Charmaine, 34, ug anak sa naulahi nga si Miguel Paolo, 15, ug katabang nga si Alma dela Torre diha sa usa ka apartment sa barangay Capitol Site. (Darrel Carumba ug Lesley Caminade)   (BANATNEWS)