Canoy supak sa San Fernando i-Comelec control

CEBU, Philippines - Si Bise Mayor Antonio “Abby” Canoy sa lungsod sa San Fernando supak nga ipaubos sa Comelec control ang San Fernando.

Matud pa ni Canoy nga walay igong basihanan si Mayor Lakambini “Neneth” Reluya sa giingong gihulga ang kinabuhi niini busa gusto niyang kontrolahon sa Comelec ang ilang lungsod.

Sayo niini gibutyag ni Reluya nga may armadong mga tawo nga nagsul-ob og bonet nga kanunay nga magpaatbang sa iyang balay didto sa barangay Panadtaran sa maong lungsod.

Unya may higayon usab nga ang maong mga armadong mga tawo nga giila niya nga si “Chokoy” ug ‘Allan” nagsakay og motorsiklo ug nagsunodsunod sa iyang sakyanan.

Nasayran usab nga si Chokoy ug Allan usa ka supporter ug pag-umangkon ang usa'g-usa sa bise mayor.

Busa giawhag ni Reluya ang mga kadagkuan sa Comelec nga ilista isip “hot spot” ang San Fernando aron kabantayan kini og kapolisan ubos sa pagsuperbisar sa Comelec.

Apan si Canoy ug si konsehal Niel Enriquez sa maong lungsod hugot sa baruganan nga walay igong rason nga ipaubos sa Comelec control ang ilang lungsod tungod kay sa kadaghan nang mga piniliay nga nanglabay, wala igdungog ang San Fernando nga may nahitabong kagubot. – BANAT NEWS