45 paketeng shabu nasakmit gikan sa managsuon

CEBU, Philippines - Duha ka managsuon ang nadakpan sa kapolisan sa lungsod sa Asturias ug nakuhaan og 20 ka medium packs nga gidudahang shabu kagahapon sa buntag diha sa sitio Ubangon sa barangay Mangiao Asturias atol sa pag-serve og warrant of arrest kabahin sa kasong carnapping batok sa usa kanila.

Ang kapolisan wala magtuong daghang shabu ang makuha gikan sa managsuong Paustino Tagpuno, 47, alyas Onoy ug maguwang niining si Josipin Tagpuno tungod kay kasong karnap man ang ilang i-serve nga warrant of arrest.

Si Insp. Gerald Pelare, hepe sa Asturias Police Station nga nahinabi sa mga tigbalita mibutyag nga sayo kagahapon sa buntag miadto sila sa barangay Mangiao uban sa mga sakop sa 78th Infantry Battalion aron i-serve ang warrant of arrest kang Paustino nga giisyu sa RTC branch 59 sa dakbayan sa Toledo.

Apan sa pag-abot nila sa dapit ilang nakit-an nga nagbarog-barog sa dalan uban sa iyang igsuon nga si Josipin apan nakabantay sila og nanagan apan nangadakpan gihapon human sa ginukdanay.

 Matud ni Pelare nga sa dihang ilahang gi-body search og una si Paustino nakuha kaniya ang 20 ka medium packs nga ang sulod gidudahang shabu, P1,700 cash nga gituohang halin niini.

Samtang ang maguwang nga si Josipin nakuhaan usab nila ni Pelare og 25 ka pakete sa shabu ug P300 cash.

Si Pelare nagkanayon nga apil sa ilang target list si Paustino nga tigpayuhot og ginadiling drogas ug level 2 kini sa ilang listahan ug magkuhaan og suplay niini sa dakbayan sa Sugbu. - Rey Pasaporte (BANAT NEWS)