Vidal way tulubagon pagdawat og donasyon

CEBU, Philippines - Usa sa dagkong opisyal sa Catholic Faith Defender midepensa ni Cebu Archbishop Ricardo Cardinal Vidal kabahin sa pag-angkon niining midawat siya og mga donasyon gikan sa halos tanang mga kandidato apan iyang gihatag ngadto sa mga charitable institutions sa Archdioceses sa Sugbu.

Sumala pa ni Marcelo Bacalso, nga usa ka abogado, si Cardinal Vidal walay tulubagon niini bisan paman og ang Section 104 sa Omnibus Election Code nagtumbok nga gidili ang paghatag sa mga kandidato og mga donasyon ngadto sa mga relihiyosong organisasyon.

“Ang pagdawat ni Cardinal Vidal walay tinguha nga duna siyay dapigan sa nanghatag kaniya kay ang pagpadangat sa hinabang ngadto sa mga kabos obligasyon man kini sa simbahan,” pasabot pang Bacalso sa interbyu sa DyRF.

Hinuon giklaro niining lahi ang legal nga aspeto kay sigon sa balaod “iyang (Cardinal Vidal) obligasyon ang pagtug-an sa mihimo og krimen,” apan dili kini mahimong pugson sa pagtug-an.

Matud pa niini nga si Cardinal Vidal dili usab mahimong hatagan og summon sa Prosecutors office aron patug-anon sa mga pangalan sa midonar sanglit wala may kasong gipasaka kabahin niini.

Apan iyang gitataw nga ang mga kandidato maoy may dakong kalapasan sa balaod sa ilang gibuhat, sumala pa niini nga kun di moreklamo ang Comelec mahimo nga ang Ombudsman maoy mohimo niini. - Chester Abadilla (BANAT NEWS)