Basketball board ni Atan sa Buot-Taop gitangtang

CEBU, Philippines - Subli na usab naukay ang isyu sa ‘basketball terrorism’ nga gipasangil kaniadto pa sa oposisyon ngadto sa binuhatan sa Bando Osmeña Pundok Kauswagan diha sa barangay Buot-Taop kansang kapitan sakop sa oposisyon.

Si Kapitan Ritchie Sibla sa pakighinabi sa Banat News sa telepono kagahapon mipadayag sa iyang kasagmuyo kang Mayor Tomas Osmeña human gitangtang sa mga sakop sa Squatters Prevention Encroachment and Elimination Division (SPEED) ang basketball board nga gidonar kaniadto ni businessman Jonathan ‘Atan’ Guardo sa sitio Taop.

“Nahinobra na ni ilang pagpanggukod da. Kay kung di daw nako ipatangtang (board ni Atan) ilang kuhaon ang stand,” matud pang Sibla nga sakop sa Kugi Uswag Sugbu party.

Sumala pang Sibla ang board ni Guardo gidonar na niadto pang milabay’ng tuig kini human wala mohatag ang dakbayan sa duha ka mga suwat sa kapitan nga nangayo og basketball board.

“ Duha ka tuig na kong nag-request ana sa city hall, karong gitaod na ang board ni Atan nangigi naman, ila naman pud ipatangtang tauran sad nila og ilang board,” matud pa niini.

Matud pang Sibla misuwat na siya kaniadto nila ni Konsehal Joey Daluz ug Konsehal Bob Cabarubias apan wala gyud kini mahatag maong dihang mipadayag si Guardo nga maoy mohatag niini iyaha kining gidawat.

Apan kagahapon gitangtang kini ug giilisan sa BOPK nga basketball boards, matud pang Sibla nga nangulo sa pagpatangtang niini ang kagawad nga si Rosalita Calino, nga kanhi barangay kapitan sa maong barangay ug sakop sa BOPK.

Ang barangay gikatakdang mosaulog sa ilang kapistahan sa ilang patron nga si Senyor San Jose karong Marso 19 ug karong adlawa gikatakda ang semi-finals sa ilang liga sa basketball.

Apan si Calino sa pakighinabi sa Banat News sa telepono nagkanayon nga angayan nang tangtangon ang board sanglit daan na kaayo ug gubaon.

Giklaro usab niining walay mireklamong mga residente sa ilang gihimo sanglit mas makapabor pa niini ang mga mogamit sa maong duwaanan.

Hinuon ang duha parehong masaligon nga mahinayon ug dili maapektahan ang liga sa mga kabataan sa ilang barangay bisan paman kang kinsang basketball board ang gitaod. - Edwin Ian Melecio (BANAT NEWS)