Abogado, misis napaig

CEBU, Philippines - Napaig ang magtiayong abogado ug negosyante lakip na ang ilang katabang samtang naangol usab ang usa ka huwes dihang miulbo ang sunog kagahapon sa kaadlawon diha sa Calderon Compound, Banawa, barangay Guadalupe.

Ang namatay mao ang magtiayong sila Atty. Manuel Pastrana, 76, ug ang asawa niining si Norma, 74, usa ka negosyante ug ang ilang katabang nga nailhan lang sa ngalan nga Joy nga lumad nga taga Negros.

Sa pakighinabi sa Banat News ni FO3 Antonio Gonzales, ang alarma giisa lamang sa 1st alarm ang maong sunog samtang mikabat sa dul-an usa ka milyon ang danyos sa maong sunog.

Sa pakighinabi sa mga tigbalita sa family driver sa Pastrana nga si Oliver Flores, 29, mibutyag nga iyang nadunggan ang mga siyagit nga dunay sunog, dihang iyang gisusi dako na kaayo ang kalayo sa panimalay sa iyang agalon.

Hinungdan nga gidali ni Flores pagdukdok ang pultahan sa lawak sa katabang diha sa may kusina apan wala gyud kini mangabli.

Samtang nakalingkawas sa tinong kamatayon si Court of Appeals Associate Justice Manuel Barrios nga nakabantay sa kasikas sa mga tawo ug daling migawas sa exit door sa ilang kwartong gikatulgan uban sa iyang anak nga si Atty. Manuel I. R.A. Barrios.

Matud pa ni Flores nga gipukaw pa sa mga Barrios ang magtiayon diha sa kasikbit nga kwarto ug mitubag pa nga “Oo, mogawas nami.” Hinungdan nga nanggawas nalang usab ang mga Barrios.

Apan dangtan pipila ka gutlo ug nagkaanam og kadako ang kalayo wala na gyud makagawas ang magtiayon ug ilang katabang. Ang napaig nga lawas sa katabang diha na makit-i sa may kusina samtang ang magtiayong Pastrana nakit-an lima ka metros gikan sa ilang pultahan.

Si Flores nga pito na ka bulang drayber sa magtiayon, nagtuong misuway gyud og gawas ang iyang mga agalon.

Ang umagad sa mga biktima nga mihangyong dili magpahingalan nagkanayon nga ancestral home sa mga Pastrana ang maong balay nga gitukod niadto pang 1960’s.

Si Atty. Manuel Pastrana anak sa kanhi bise-gobernador sa Kalibo Aklan samtang si Norma igsuon ni kanhi kongresista nga si Tito Calderon sa Cocofed Partylist.

Samtang si FO3 Gonzales nagdumili pa paghatag og impormasyon kabahin sa hinungdan sa sunog apan usa sa ilang gitan-aw ang posibilidad nga faulty electrical wiring ang hinungdan niini.

Ang Bureau of Fire Protection nagselebrar karong bulana sa Fire Prevention Month, mao na kini ang ikaduhang sunog karong bulana sa dakbayan, samtang gibana-banang P900 mil ang danyos niini. Ang mga sakop sa Integrated Bar of the Philippines Cebu City Chapter mipadangat sa ilang dakong pahasubo sa kabanay sa mga Pastrana ug katabang niini.

Si IBP Cebu City Chapter president Michael Yu nakurat sa maong hitabo , matud pa niini nga usa sa mga importanteng haligi sa IBP dinhi sa Sugbu si Pastrana. – BANAT NEWS