Korte way action sa kaso ni Diamante

CEBU, Philippines - Dul-an na sa napulo ka tuig ang kaso nga smuggling nga gisang-at batok ni magpapatigayon Democrito Diamante Jr. sa hukmanan sa Dakbayan sa Lapu-Lapu apan hangtud karon wala pa kini kadesisyoni.

Hinuon sa pagsulat niining maong balita wala pa mahibaw-i kun aduna na bay resolusyon nga gipagawas ang korte sa awhag sa manlalaban sa akusado nga ibasura ang kaso.

Si Diamante gipasakaan og kaso sa korte human masakmit ang iyang mga kargamento  sa tugpahanan sa Mactan niadtong Hulyo 3, 2000.

Si Manlalaban Leovigildo Dayoha, Collector of Customs III sa Port of Mactan sa iyang sulat penetsahan og Oktubre 16, 2000 maoy miduso sa piskaliya sa dakbayan sa Lapu-Lapu sa kasong smuggling ingon man Falsification by Private Individuals and Use of Falsified Documents batok ni Diamante.

Ang kaso ni Diamante may labot sa pagpayuhot sa 17 ka karton nga gipatuong electrical parts nga mitimbang og 152 ka kilo nga nagkantidad og 12,800 Japanese Yen gikan sa Osaka, Japan.

Kini naglangkob sa 3,515 ka buok relo nga Guess ang brand, ug mga karton nga ang tanan mobalor og P7 milyones.

Nahibaw-an nga tulo na ka huwes ang naghupot sa kaso ni Diamante nga naglakip nila ni Maghuhukom Leopoldo Canete, Maghuhukom Geraldine Econg ug Maghuhukom Torribio Quiwag sa Branch 27 sa Regional Trial Court sa dakbayan sa Lapu-Lapu.

Si Diamante nagpabilin nga gawasnon karon human kini makabutang og piyansa nga P100 ka libo sa duha ka kaso nga iyang giatubang.

Nasayran usab nga muabot na og unom ka higayon nga naoktaba ang pagpahigayon sa pre-trial sa kaso nga giatubang ni Diamante.

May higayon usab nga si Diamante wala na sa iyang pinuy-anan sa dakbayan sa Lapu-Lapu, ug makadaghan usab nga higayon nga nag ilis-ilis og abogado si Diamante ug ang katapusan si Manlalaban Ricardo Amores.

Si Diamante nga nagpapili karon pagka- mayor sa lungsod sa Tuburan pinaagi sa iyang manlalaban nga si Amores miawhag sa korte nga ibasura ang kaso batok kaniya gumikan kay wala siya’y labot niini.

Gani gitumbok niya nga adunay mga testigos nga wala makaila kaniya bisan gani dihang gihimo ang husay sa kaso.

Apan ang mga dokumento nga nakuha sa Banat News nagbutyag nga ang kapakyas ni Diamante pagtug-an si kinsa gayud ang tag-iya sa mga nasakmit nga butang makapatuo sa mga tinugyanan sa Bureau of Customs (BOC) sa iyang kalambigitan sa maong kaso.

Gani gumikan sa pagka diskubre sa mga butang kontrabando, ang kadagkuan sa BOC midili na ni Diamante nga makahimo og transaksyon sa bisan unsang buhatan sa BOC sa tibuok Pilipinas. – BANAT NEWS