Lider sa Crips ug Bloods gipangita

CEBU, Philippines - Si Supt. Mariano Natuel Jr., hepe sa kapolisan sa dakbayan sa Lapulapu gustong makig-estorya sa mga lider sa managribal nga gang ang Crips ug Bloods sa dakbayan sa Lapulapu alang sa kalinaw sa dakbayan.

Si Natuel mibutyag sa Banat News wala pa siya makaila sa maong mga lider apan kun magka-estorya sila iya kining hangyuon nga hunongon na nila ang ilang away aron nga magmalinawon ang dakbayan.

  Matud pa ni Natuel nga daghan kaayong mga tawo ang mapagan kun magpinusilay na ang duha ka grupo ug daghan kaayo ang maalaot.

Nanghinaut si Natuel nga makigkita kaniya ang mga lider sa Crips ug sa Bloods aron ikatakda ang ilang sabotsabot alang sa kalinaw sa  dakbayan sa Lapulapu.

Mga reservist patambongon sa tigom

Ni John Rey Saavedra

Gipahibalo sa 701st Cebu Community Defense Center ang tanang sakop sa mga Army Reservist sa 1st Cebu Ready Reserve Battalion ug Alpha Battery sa pagtambong sa usa ka panagtigum.

Si Col. Nestor Porlucas, commanding officer sa 701CDC miingon nga ang panagtigum ipahigayon sa Army Reservist Center sulod sa Camp Lapulapu.

Ang maong panagtigum gitumong aron hisgutan ang nagsingabot nga Assembly Test sa 701CDC.

Sa susamang kalambuan, ang first sergeant sa 701 CDC nga si Technical Sgt. Ronilo Cabizares nagkanayon nga kadtong motambong sa panagtigum nga wala pa maka-fill up og Reservist Information Data Sheet (RIDS), giawhag sa pagdala og 2x2 nga hulagway aron maka-fill-up atol sa panagtigum.

Ang commanding officer mao si 1stRRBn nga si Maj. Soliver Peras, samtang sa Alpha Battery (artillery battalion) mao si 1Lt. Guy Gabison.  - John Rey Saavedra (BANAT NEWS)