CEBU, Philippines - Usa ka batan-on nga mitabok gikan sa Crips gang paingon ngadto sa Bloods gang giunay sa pagpatay sa kanhi niya ka-frat pinaagi sa pagpusil pasado alas 8 sa miaging gabii sa sitio Tunob Lapuk, barangay Inayawan.
Ang namatay nailhan nga si Jeffrey Maloloy-on Jakosalem, 18, molupyo sa nahisgutang lugar ug giingong kanhi sakop sa Crips gang ug mibalhin sa Bloods gang.
Samtang ang mamumuno nailhan lang sa ngalan nga “Erap” nga kanhi kauban ni Jakosalem sa Crips gang. Si Erap kauban sa duha ka wala mailhing lalaki nga gituohang mga kauban sa gang.
Nasayran nga ang biktima maayong pagkahinanok og katulog sa usa ka lantay atbang sa San Roque Chapel sa nahisgutang lugar sa dihang kalit siyang giduol ni Jakosalem uban sa duha ka wala mailhing lalaki.
Gipaulanan og bala gikan sa wala masayring kalibre sa armas si Jakosalem. Misulay unta kini pagdagan bisan paman og samdan sa nagkadaiyang parte sa lawas apan natumba ra usab kini pipila ka metros sa iyang pagdagan.
Samtang ang mamumuno ug duha ka kauban daling naka-ikyas human miabot ang grupo sa mga barangay tanod sa Inayawan nga mi-alarma human makadungog sa botoboto.
Daling gidala sa Cebu City Medical Center ang biktima tungod sa naangkon nga samad pinusilan apan pipila ka oras namatay ra usab kini.
Sa pakighinabi sa kapolisan sa apohan sa biktima nga si Primitivo, mibutyag kini nga ang iyang apo kanhi miyembro sa Crips ug mibalhin kini sa Bloods sa dihang nakabaton kini og mga higala nga sakop sa Bloods.
Dugang pa sa apohan nga sa milabay’ng tulo ka adlaw ang iyang apo gisuwayan pa unta pagpusil ni Erap, apan wala kini maigo. Iyang gipangutana ang apo kun unsay hinungdan sa pagpamusil sa suspetsado ngadto kaniya igo lang kini nga mitubag nga kalambigitan sa away sa manag-atbang nga gang.
Sa pakighinabi sa Banat News ni SPO3 Rey Cuyos, mibutyag kini nga si Jakosalem gitumbok nga maoy namusil niadtong Nobiyembre 29, 2009 sa usa ka Jeremiah Galupo nga molupyo sa Ocampo Drive, barangay Inayawan.
Gani matud pa ni SPO3 Cuyos ila kining gipasakaan og kasong “murder” bisan pa man og gawasnon ang batan-on. Ang mamumuno nga si Erap padayong gisusi aron makuha ang tinuod nga ngalan ug aron madakpan aron patubagon sa kamatayon ni Jakosalem. – BANAT NEWS