Liog sa tomboy gilubag patay, uyab nasalbar

CEBU, Philippines - Gilubag ang liog nga daw manok ug namatay ang usa ka tomboy samtang diriyot malugos ang uyab niining babaye sa tulo ka wala mailhing mga lalaki samtang ang duha nag-date diha sa daplin sa baybayon sa barangay Poblacion lungsod sa San Remegio.

Ang namatay mao si Monalisa Mantos Cabataña, 20, sa sitio Camansiles sa barangay Dapdap, giingong usa ka tomboy ug ang diriyot malugos nga uyab niini nagpangidaron pa og 17-anyos nga molupyo sa barangay Looc. Sumala pa ni PO2 Herman Bulawit sa pakighinabi sa Banat News nga ang duha gikan mitambong og disko sa barangay Poblacion ug miadto sa daplin sa baybayon duol sa diskohan apan samtang nagpahuway kalit lang adunay miduol nga tulo ka lalaki ug nanghulam og lighter.

Apan dihang gitubag kini sa dalagita og: “wala man koy lighter kuya kay dili man ko manigarilyo,” kalit kining giguroy sa duha ka lalaki samtang ang usa mikupot ni Cabataña.

Sumala pang Bulawit nga ang duha nga miguroy sa dalagita daw miakto og lugos sa naulahi pinaagi sa paghikap-hikap sa pribadong parte sa iyang lawas hinungdan sa iyang pagkisi-kisi ug gipaslakan og balas ang iyang baba.

Tungod kay daw desidido gyung lugoson siya nga giingnan niya ang mga lalaki nga gidugo siya hinungdan nga gihunong sa mga gikatahapan ang ilang gibuhat apan gikuha ang iyang cellphone ug mibiya.

Dali niyang gisusi si Cabataña kinsa nagbuy-od na sa balas apan wala na kini mobangon dihang iyang gisampit ug sa kahadlok dali siyang nangayo og tabang sa mga higala.

Ang mga polis nga miresponde daling midala kang Cabataña ngadto sa Bogo District Hospital apan gideklarar kining dead on arrival. Matud pang Bulawit base sa awtopsiya sa lawas ni Cabataña migawas nga ang hinungdan sa kamatayon niini mao ang internal hemorrhage human lubaga ang liog niini ug duna sad timailhang gikulata kini. – BANAT NEWS