Chinese naglutaw sa dagat

CEBU, Philippines - Usa ka batan-ong Chinese ang napalgan kagahapon alas-8 pasado ang takna sa buntag nga naglutaw sa kadagatan sa FF Cruz sa north reclamation area sa barangay Subangdaku, dakbayan sa Mandaue.

Sayo kagahapon sa buntag, si PO3 Robert Neri sa homicide section sa kapolisan sa Mandaue City Police Office (MCPO) nga nahinabi sa Banat News mibana-bana sa edad sa maong patay’ng lawas nga 19 ngadto sa 20 anyos, 5’6 ang height, kasarangan ang panglawas ug nagpurol ug nag-t shirt.

Apan kagahapon sa hapon, ang kapolisan miila na sa maong lalaki nga usa diay ka Chinese nga giilang si Joey Zhang, 19, kinsa bag-uhay palang nakaabot dinhi sa Pilipinas gikan sa China duha ka semana na ang nakalabay.

Gikatahong ang maong langyaw nagtrabaho sa usa ka Chinese nga tindahan sa Mandaue nga wala hinganli sa kapolisan human gitabangan sa paryenteng Chinese nga makatrabaho dinhi.

Nagduda ang mga polis nga posibleng nakasab-an kini sa agalong Chinese ug naghikog. Gikatahong sukad pa niadtong adlaw'ng Sabado sa hapon hangtud niadtong Domingo wala na mouli si Zhang diha sa ilang gipuy-an (lugar wala usab ibutyag pa sa kapolisan).

Niadtong Domingo, gi-report kini sa kabanay ngadto sa Subangdako police station nga na-missing apan kagahapon patay na kining nakaplagan , gidudahang niadto pang Sabado sa gabii kini namatay.

Samtang narekober pa sa kapolisan ang pitaka niini gawas lang sa iyang cellphone nga gituuhang naanod o ba kaha natagak sa dagat.

Matud pa ni Neri nga dili pa nila matino ang hinungdan sa kamatayon sanglit sa ilang pagsusi sa kalawasan walay nakitang samad niini gawas lang sa usa ka matang milugsot na bunga sa pagkahumod sa dagat.

Ang patay’ng lawas kasamtangang gipahiluna sa Cosmopolitan Funeral Parlor sa dakbayan sa Mandaue alang sa pag-ila niini. (BANATNEWS)