CEBU, Philippines - Namatay ang usa ka batan-ong lalaki human kini dunggaba sa wala hiilhing mamumuno didto sa dalan Lopez Jaena, sa barangay Subangdaku, dakbayan sa Mandaue sa miaging kaadlawon.
Ang namatay mao si Alvin Alburo, ulitawo, lumad nga taga barangay Malingin, dakbayan sa Bogo , apan temporaryong nagpuyo sa lungsod sa Cordova.
Si PO3 Robert Neri sa homicide section sa Mandaue City Police Office (MCPO) nga nahinabi sa Banat News mibutyag nga nakig-inom pa ang biktima sa iyang mga higala sa usa ka videokehan sa maong dapit nianang sayong kagabhion.
Apan matud pa ni PO3 Neri nga dihang migawas na kini gikan sa inom, gisugat kini sa wala hiilhing grupo sa mga batan-ong lalaki ug usa kanila maoy milanit og kutsilyo ug gihansak sa walang dughan sa biktima.
Dihang nahagba na ang biktima sa yuta mikaratel dayon og panagan pahilayo sa aong lugar ang mga kriminal.
Gidala pa ngadto sa Mandaue City District Hospital ang biktima apan didto kini ideklarar nga patay na.
Gipangita pa karon sa kapolisan ang mga kriminal. (Romeo T. Limpangog) (BANATNEWS)