Kusog nangapod og food packs

CEBU, Philippines - Nangapod-apod og mga “food packs” ang kampo sa Kugi Uswag Sugbo (Kusug) pinangulohan sa negosyanteng si Jonathan “Atan” Guardo sa mga nabiktima sa sunog sa sitio Tambisan barangay Tisa dakbayan sa Sugbo kagahapon sa hapon.

Apan nagkanayon si Guardo pipila sa mga biktima ang nagduha-duha sa pagdawat sa ilang mga pagkaon tungod kay gipasidan-an silang kun modawat og laing hinabang gikan kaniya dili na sila iapil sa listahan sa urban poor.

Nagkanayon usab kini nga base sa iyang nadawat nga impormasyon dunay mga tawong gitahasang mokuha og hulagway niadtong mga molupyong makit-ang modawat og hinabang gikan sa oposisyon.

Ang mga biktima gikatahong gisaaran sa kagamhanang lokal sa syudad sa Sugbo nga hatagan og mga plywood ingon man sin kon atop aron subling makatukod sa ilang naugdaw nga mga panimalay.

Mipasangil si Guardo nga lain na usab kining matang sa pagpang-harass batok kaniya nga ang tumong ug tuyo ra man unta nila nga makatabang sa mga nabiktima sa sunog.

Hinoon adunay pipila ka mga residente ang midawat sa maong mga hinabang ug mipasalamat sa ilang nadawat.

Sila si Guardo ug Cebu City Mayor Tomas Osmeña nag-atbang pagkakongresista sa south district sa dakbayan sa Sugbo.

Kahinumduman nga kapin usa ka gatus ka panimalay ang naugdaw sa nahitabong sunog niadtong Pebrero 23 sa hapon.

Apan si City Information Officer Nagiel Banacia mihimakak sa mga alegasyon ni Guardo tungod kay trabaho sa syudad ang paghatag og serbisyo ug hinabang sa mga biktima sa katalagman diin kun adunay mohatag og hinabang daku na kining tabang sa syudad.

Dugang pa niini nga basin ang mga tawo ang dili gyud modawat sa iyang hinabang. Sumala pa niini nga nibuhat ra og isyu kalabot niini sa Guardo aron nga kanunay’ng ma-estoryahan sa radyo ug mamantala sa mantalaan. “The city will not glorify his allegation,” panapos pa niini.  - BANAT NEWS