Sakristan gitulis gitipi

CEBU, Philippines - Patay ang usa ka 14-anyos nga sakristan sa simbahan human kini giulo pagpusil sa usa sa tulo ka gidudahang mga tulisan nga nagtaptap sa ilang mga nawong pasado alas-7 sa buntag kahapon diha sa dalan Lim Kaking Horseshoe Hill sa barangay Guadalupe.

Si Carlo Sacedon Mangitngit, 14, taga sitio Sodina sa nahisgutang barangay ug usa ka sakristan sa Alliance of Two Hearts Church ang gipusil sa tulo ka lalaking nagsakay og motorsiklong walay plaka nga nagsuot og helmet ug jacket nga itom ug nagtaptap og t-shirt sa ilang mga nawong.

Sa imbestigasyon sa Theft and Robbery Section, gisugo ang biktima sa iyang apohan pagpalit og kalamunggay diha sa eskina sa dalan V. Rama ug Banawa.

Apan samtang naglakaw gikatahong nagpunay kini og text base sa mga nakakita ug kalit nga gihunongan sa tulo ka lalaking nagmotor ug mideklarar kini og tulis. Ang bata sa kahadlok sa pagtion sa pusil wala kini pagduha-duhang mitunol sa iyang cellphone nga Nokia 3310 nga nagkantidad og P500.

Human mahatag sa biktima ang iyang cellphone mikaratil kini og dagan apan gipusil kini sa likod nga bahin sa iyang ulo sa usa sa mga gikatahapan dayon nagdali pagbiya sa lugar.

Ang biktima daling gidala sa Vicente Sotto Memorial Hospital apan sa report sa DyAB kagahapon sa hapon gikatahong nakabsan kini sa kinabuhi pasado alas 4 sa hapon kagahapon.

Gikumpirmar usab ni Chief Inspector Michael Anthony Bastes hepe sa Theft and Robbery Section sa pakighinabi sa Banat News nga nakabsan gyud sa kinabuhi ang biktima, apan nagduda kining mga tulisan gyud ang mga gikatahapan.

Nagduda siyang mga sakop kini og gang diha sa maong lugar nga posibleng nakahingos og ilegal nga drugas ug na-tripingan ang biktima ug gitulis.

Dugang pa ni Bastes nga base sa gibuhat sa tulo, dili sila mga ‘banggiitan’ tungod kay hasta bata nga baratuhon og cellphone gidaginot ug gipusil pa gyud.

Sa pagkakaron aduna nay giimbitar ang kapolisan sa TRS kini aron pangayoan og impormasyon ug posibilidad nga may kalambigitan sa maong krimen. – BANAT NEWS