NP-NPC coalition mini - Gascon

CEBU, Philippines - Ang Liberal Party (LP) nagtuo nga dili aprobahan sa Commission on Elections (COMELEC) ang coalition o panagtipon karon sa Nacionalista Party (NP) ug sa Nationalist People’s Coalition (NPC) o NP-NPC Coalition tungod kay usa kini ka mini nga coalition.

Mao kini ang gipadayag ni Director General Chito Gascon sa LP kinsa nagkanayon nga ang NP-NPC Coalition usa lamang ka pagpatuo nga mas daghan sila og kandidato kay sa LP alang sa umaabot nga election.

Matud pa ni Gascon nga usa lamang kini ka pagpaka-aron ingnon ni Senador Manuel Villar aron patuohon ang katawhan nga mas lig-on sila og puwersa kay sa LP.

Miingon si Gascon nga kun tinuod pa ni, karon palang unta ila nang iplastar ang usa ka lig-ong sistema aron nga dili magkagubot ug magkaguliyang ang ilang mga kandidato sa lokal nga mga posisyon.

Nalantawan ni Gascon ang dakong gubot niining gitukod nga NP-NPC Coalition tungod kay giilogan karon sa duha ka partido ang l5 ka mga lingkoranan sa kongreso.

Nag-inilogay usab sila sa lima ka puwesto sa pagka-gobernador, walo sa pagka-bise gobernador, ug 78 ka puwesto sa mayor.

Gitumbok ni Gascon ang nahitabo sa ikalimang distrito sa lalawigan sa Iloilo diin si Bise Gobernador Rolex T. Suplico sa NP, makig-ilog sa maong posisyon sa kandidato sa NPC nga si Raul S. Alba.

Susama usab niini ang sitwasyon sa Davao del Sur, diin si Representante Marc Douglas Cagas sa NP ug Erwin Llanos sa NPC nag-inilogay usab sa maong puwesto sa unang distrito sa maong lalawigan.   (Wen Celen)   (BANATNEWS)