Negosyante'g sardinas gikidnap

CEBU, Philippines - Nagpadayon ang imbestigasyon sa Negros Occidental Provincial Police Office kon NOPPO subay sa nahitabong pagdagit niadtong Biyernes sa buntag sa usa ka magpapatigayon sa Bago City sa Negros Occidental.

Giila ang biktima nga si Jordan Chua, 26, nanag-iya og usa ka kompaniya sa sardinas nga nagbase dinhi sa Sugbo apan lumad taga Cagayan de Oro ug temporaryo nga nagpuyo sa Sta. Clara Subd. barangay Mandalagan Bacolod City.

Ang kapolisan padayon pa sa pagpangita sa mga kidnaper nga giingong “Tagalog” speaking.

Matud ni Chief Inspector Jefferson Descallar ang chief operations sa NOPPO nga nahinabi sa DySS nga nagbisikleta ang biktima uban sa iyang mga higala dihang kalit nga gibabagan sa mga wala mailhing lalaking luwan og silver gray nga Toyota Grandia nga wa’y plate number ug gipugos nga gipasulod sa sakyanan si Chua.

Samtang samaran usab ang usa sa tulo ka mga kauban sa biktima nga si Joey Arroyo nga napusilan sa iyang dughan human mosuway og babag, samtang luwas ang lain pang kauban niining sila si Mark Salazar ug Jun-jun Lopue.

Si Arroyo usa ka marketing manager sa usa ka negosyo nga adunay operasyon sa Visayas ug Mindanao.    (BANATNEWS)