CEBU, Philippines - Giangkon sa Metro Cebu Water District kon MCWD nga hinay-hinay nang mihubas ang tubig sa Buhisan Dam nga maoy usa sa ilang tinubdan sa supply sa tubig sa MCWD sa mga konsumidor sa Metro Cebu Area tungod sa grabeng huwaw resulta sa mild El Niño phenomenon.
Hinuon giklaro sa kadagkuan sa MCWD nga dili angayan nga mabalaka ang katawhan nga kulangon ang supply sa tubig tungod kay duna pa sila’y laing tinubdan sa tubig.
Matud pa ni Edna Enocando, ang officer-in-charge sa Public Affairs Office sa MCWD dili angayang mabalaka ang publiko sa maong sitwasyon sanglit mga 10 porsiyento lamang ang makuha nilang supply sa tubig gikan sa Buhisan Dam.
Sumala pa ni Enocando nga 90 porsiyento sa tubig sa MCWD gikuha gikan sa 112 ka mga water wells gikan sa nagkadaiyang lugar sa Metro Cebu.
Giangkon niining magkulang gyud og dili mominus sa dos mil metro kubiko (2,000 cubic meters) ang supply apan mahimo ra kining kuhaon sa laing tinubdan.
Giawhag niini ang katawhan nga magdaginot kanunay sa tubig ug dili mag-usik usik niini. (Chester Abadilla) (BANATNEWS)