Manag-uyab nga langyaw gi-ambusan

CEBU, Philippines - Duha ka manag-uyab nga langyaw’ng mga arkitekto ang nakalingkawas gikan sa tinong kamatayon human gikatahong gisuwayan sila og banhig sa duha ka mga wala mailhing lalaki diha sa bukirang barangay sa Malalay lungsod sa Ronda niadtong Biyernes sa alas 8:00 sa gabii.

Ang mga biktima mao ang manag-uyab nga sila si Bogdan Rusea, 27, usa ka arkitektong Romanian ug ang hinigugma niining si Marta Agniesska, 26, nga usa ka Polish.

Matud ni PO1 Benjie Garcia sa Ronda Police dihang nahinabi sa Banat News ang mga biktima sakay sa ilang Toyota Vios gikan nanuroy sa barangay Mantalongon sa lungsod sa Dalaguete ug padulong nga mamauli sa Moalboal diin magpuyo si Rusea.

Apan pag-abot nila sa sitio Bung-aw barangay Malalay nakalimot na si Rusea sa agianan hinungdan nga dihang ilang nasigpatan ang duha ka gikatahapan ilaha kining gihunongan aron unta mangutana.

Nakugang nalang sila dihang kalit mibunot ang usa sa mga batan-on og wala matinong kalibre sa armas hinungdan nga gipasutoy ni Rusea ang iyang sakyanan pahilayo.

Apan pag-abot nila sa unahan napugos sila og hunong tungod sa mga dagkong batong gibabag sa karsada hinungdan nga miatras sila og balik ug subling naagian ang mga gikatahapan nga giingong mipaulan dayon kanila og bala.

Swerte hinuong walay nasakitan sa manag-uyab ug luwas nga nakaabot sa lungsod sa Ronda ug misumbong sa kapolisan ug gipakita ang nag-inusarang buslot sa walang bahin sa atubangan sa iyang sakyanan nga inagian sa bala ngadto sa mga polis.

Ang kapolisan padayon pang nag-imbestigar pag-ila sa maong mga batan-on. (Darrel Carumba)    (BANATNEWS)