Papa nangita'g sud-an gipatay

CEBU, Philippines - Naglunang sa kaugalingong dugo ang usa ka amahan human kini gipusil sa wala pa mailhing mamumuno sa miaging hapon pasado alas-5 sa sitio Kilat barangay Buhisan.

Ang namatay giilang si Bavencio Villona, 39, taga Lower South Hills sa barangay Tisa kinsa nakaangkon og samad pinusilan sa tuong tampihak ug likod nga milapos sa dughan.

Nasayran nga ang biktima nananghid sa iyang anak nga menor de edad nga molakaw aron mokuha og taklong (kuhol) sa maong lugar aron isud-an sa panihapon.

Apan wala na kini makauli ug dihang giapas sa iyang anak ug mga ig-agaw napalgan kining patay na ilawom sa dakong kahoy ug may mga samad pinusilan.

Nakuha diha sa crime scene ang unom ka kabhang sa wala pa matinong kalibre sa armas nga gituuhang maoy gigamit pagpusil sa biktima.

Sa pakighinabi sa Banat News ni PO2 Leroy Baguio dunay mga residenteng nakadungog og buto sa armas gikan sa dapit ug nag-iyahay sila og panagan.

Nagduda si Baguio nga posibleng naalaan ang biktima nga manguha og kahoy sa maong dapit nga gidili pagpamutol, gikatahong dunay mga gwardiyang nagbantay sa maong lugar. - BANAT NEWS