PDEA-7 hataga'g van ni Gwen

CEBU, Philippines - Si Gobernador Gwendolyn Garcia mipasalig   nga mohatag og bag-ong sakyanan ngadto sa Philippine Drug Enforcement Agency (PDEA-7).

Kini human nakita ni Garcia ang maayong performance sa PDEA-7 sa kampanya batok sa ilegal nga drugas sa nakalabay nga tuig.

Sumala pa ni Garcia nga haum lamang nga mahatagan og brand new nga KIA van ang PDEA human mitriple ang gidaghanon sa mga operasyon sa PDEA-7 ug daghang tigpayuhot og ginadiling drugas ang nadakpan.

Nasayran nga atol sa gipahigayong Regional Peace and Order Council (RPOC) meeting niadtong Huwebes, ang regional director sa PDEA-7 nga si Randy Pedroso mi-report nga niadtong tuig 2008 ang operasyon sa PDEA-7 miabot lamang og 366 nga misangpot sa pagkasikop sa 506 ug napasaka ang 429 ka mga kaso ngadto sa korte, apan sa tuig 2009 ang operasyon miabot og 1,075 ug nasikop nila ang 1,220 ka mga drug pusher ug napasaka ang 1,034 ka mga kaso ngadto sa korte.

Sumala pa sa gobernadora nga tungod sa maong kalambuan iyang hatagan og sakyanan ang PDEA-7 aron sayon ang mobility niini sama sa iyang gihatag ngadto sa kapolisan sa lalawigan sa Sugbo.

Si Pedroso sa iyang bahin mapasalamaton sa gobernadora dili lamang sa ihatag niining sakyanan kun dili sa walay puas nga suporta nga gikan sa kagamhanan sa lalawigan.

Dugang pa ni Pedroso nga kun wala ang intervention ug paninguha sa gobernadora nga ma-deputize sa PDEA ang kapolisan, militar ug mga barangay tanod, dili sila makaangkon sa ilang kalampusan karon. - Chester Abadilla (BANAT NEWS)