'Rain dance' sa Carmen susihon sa hunta

MANILA, Philippines - Mohimo og imbestigasyon ang hunta probinsyal sa reklamo sa konseho sa lungsod sa Carmen may labot sa law-ay’ng pasundayag sa mga kababayen-an nga gawas nga mugbo kaayo ug nipis ang mga sapot gipakaligo pa kini og beer samtang nagsayaw ibabaw sa stage sa lungsod niadtong Enero nga gipasiugdahan ni Mayor Sonia Pua.

Si bokal Agnes Magpale, chairman sa Committee on Women and Children mipadayag nga sugdan dayon niya karong Lunes ang imbestigasyon pinaagi sa pagpadala og mga sakop sa Provincial Women’s Council (PWC) sa maong lungsod aron mohimo og dugang kasayuran sa maong panghitabo.

Giangkon ni Magpale nga hangtod kagahapon wala pa siya makadawat og pormal nga kopya sa resolusyon sa konseho sa lungsod nga nag-awhag pag-imbestigar sa gipasundayag nga “Carmen Rain Dance 2010.” Apan aksiyonan dayon niya kini sa labing daling panahon tungod kay moralidad sa kababayen-an ug mga batan-on ang nalambigit niini.

Hinuon gipadayag sa sekretarya ni Pua nga si Dona Buot, kinsa maoy mitubag sa interbiyu sa Banat News, nga andam ug tagana ang mayor pag-atubang sa himuong imbestigasyon.

Dugang ni Buot nga alang sa mayor wala silay nahimong kalapasan sa maong pasundayag tungod kay usa lang kini ka ordinaryong kalihukan nga tipik sa kasaulogan sa Sinulog sa maong lungsod.

Gipadayag usab ni Buot nga dili tinuod nga law-ay kaayong tan-awon ang mga babaye nga nagpasundayag niadtong higayona ibabaw sa stage ug labaw nang dili tinuod nga gipakaligo og beer.

Ang kumpletong tubag sa mayor, matud ni Buot, adto ipalanog sa imbestigasyon.

Si Pua wala personal nga makatubag sa maong isyu gumikan kay bise kaayo kini kagahapon sa dihang gitawagan sa Banat News sa iyang opisina tungod kay na-atol nga duna kini gikasal ug pagkahuman dunay gipahigayong tigum sa mga kapitan kabahin sa Egwen project. – BANAT NEWS