14-anyos patay human motor midasmag sa iro

CEBU, Philippines - Usa ang patay samtang tulo ang naangol human ang ilang sakyanan nakaligis og iro pasado alas-12 sa tungang gabii sa national highway sa barangay Tinga lungsod sa Moalboal.

Ang namatay, Kevin Saac, 14 samtang ang angol mao sila Jesus Saac Ombos nga drayber sa usa ka motorsiklo, Marlo Veloso, 20 uban sa igsuon niining si Juliven Veloso, 17, nga pulos taga barangay Lanao sa nahisgutang lungsod.

Sa pakighinabi sa Banat News kang PO1 Camilo Zafra kini mibutyag nga ang upat nagsakay sa motorsiklo gikan namisita sa uyab ni Ombos sa barangay Basdiot sa nahisgutang lungsod.

Pag-abot nila sa national highway wala makabantay nga may milabang nga duha ka iro,usa niini ang ilang naligsan nga miresulta sa pagkalagpot ug pagkatumba nila.

Ang 14-anyos maoy nagrabihan sa pagkalamba sa sementadong poste sa kuryente nga miresulta sa iyang hinanaling kamatayon samtang gidala sa Badian District Hospital ang mga kauban niini.  - Lesley Caminade (BANAT NEWS)