CEBU, Philippines - Patay ang usa ka babaye human kini tigbasa sa ilang silingan sa sitio Basak Eskwelahan, barangay Basak, dakbayan sa Lapulapu kagahapon sa buntag.
Si Verginia Sumalinog Igot, 35, gikatahong gitigbas sa usa ka Feli Lupanggo alyas Lingling, 60. Matud pa ni PO1 Maximo Villagonzalo Jr. sa Crime Against Persons desk sa kapolisan nga si Igot uban sa iyang ig-agaw nga si Arlyn Oyao Monsner gikan namisita sa ilang silingan sa dihang gitigbas ni Lupanggo sa dihang miagi kini sa balay sa naulahi.
Samaran sa tangkugo si Igot agi sa 18-pulgadas nga pinote, apan wala na kini makaabot sa Lapulapu City Hospital. Panagsungi sa pamilya ang gituohang hinungdan sa pagpanigbas. Si Lupanggo maoy amahan sa bana sa igsoon ni Igot nga pulos residente sa maong dapit. (BANATNEWS)