Premature gilubong sa silong

CEBU, Philippines - Usa ka batang premature kinsa namatay tulo ka adlaw human kini i-anak sa inahan sa ilang balay, gilubong lang sa silong sa balay sa iyang apohan sa sitio Lawis, barangay Tanke, dakbayan sa Talisay tungod sa kawad-on.

Base sa balita sa ABS-CBN Abante Bisaya kagahapon sa buntag nasayran nga si kagawad Leo Cabalan sa nahisgutang barangay maoy mibutyag nga pito ra ka buwan ang maong bata dihang gipanganak kini ug gani wala maklaro kun lalake o babaye ba ang maong bata.

Kasagaran sa bata siyam gyud ka buwan una mogawas sa tiyan sa inahan, apan kun dili maayo ang taguangkan sa usa ka inahan usahay pito pa ka buwan matawo na kini.

Kun adto matawo sa hospital isulod dayon og incubator balig duha ka buwan ang bata una ihatag ngadto sa mga ginikanan.

Si Roberto Cabanes, hingkod, nga maoy apohan sa bata miangkon nga wala gyud silay kuwarta nga ikapalubong sa menteryo sa iyang apo.

Gani malagmit namatay kini kay wala ikasulod sa incubator ug wala usab makasuso sa inahan kay grabe ang kahimtang niini human manganak ug gihatod dayon ngadto sa tambalanan.

Sa pakighinabi sa Banat News kang Kapitan Perla Cabanes, siya miingon nga nakadungog na siya sa maong estorya apan walay mitaho niini ngadto kaniya. (BANATNEWS)