Notadong pusher nasikop sa PDEA

CEBU, Philippines - Milampos pagsikop sa notadong drug pusher uban sa laing tulo ka kauban niini ang mga ahente sa Philippine Drug Enforcement Agency (PDEA)-7 atol sa ilang gipahigayong buy bust operation didto sa Duljo Fatima, ning dakbayan sa Sugbo, sa miaging gabii.

Si Jessie Tabanao nga nahinabi sa Banat News miila sa ilang dinakpan nga sila si Magno Oralde, Steven Cabigon, Leonel Abayan ug Randy Alcordo, pulos hingkod, nga taga Duljo Fatima.

Si Tabanao nagkanayon nga ang buy bust operation ilang gilusad human matino ang kalihukan sa mga suspetsado sa pagpamaligya og shabu.

Gipangunahan ni Deputy Regional Director Yogi Felimon Ruiz sa PDEA 7 ang maong misyon. Matud ni Tabanao nga ang ilang target mao gyud si Oralde apan si Cabigon maoy misugat sa pusuer buyer ug mao nay mikuha sa kuwarta ug gitunol kini ngadto kang Oralde ug dayong hatag sa shabu ngadto sa pusuer buyer.

Matud ni Tabanao dihadiha ila dayong gisikop sila si Oralde ug Cabigon apan sila si Alcordo ug Abayan kinsa gikatahong gikang namalit og shabu kang Oralde ila usab kining gidakop ug nakuhaan og tagsa ka paketeng shabu. Matud ni Tabanao nga dugay na silang nakadawat og report nga ang kilid sa balay ni Oralde suyopanan og shabu sa mga dorogista. (BANATNEWS)