Entrapment operation batok Citom
CEBU, Philippines - Andam nang molusad og entrapment operation ang kapolisan sa syudad sa Sugbo aron masikop ang mga miyembro sa City Traffic Operation and Management (CITOM) nga mangilkil sa mga drayber sama sa nahitabo sa 31 ka enforcer.
Matud pa ni Cebu City Police director Patrocinio Comendador nga kining maong lakang maoy ilang ikahatag nga suporta sa kagamhanan sa dakbayan sa pagpitol niadtong mga sakop sa Citom nga surambaw.
Matud pa ni Comendador nga sa miaging tuig aduna usab silay nasikop nga duha ka traffic enforcer nga nangilkil.
Mipasabot usab si Comendador nga dili usab niya mabasol ang mga pipila ka sakop sa Citom nga natintal sa kuwarta kay gamay ra kaayo sila og suweldo.
Iya usab nga gihangyo ang mga drayber nga dili mohatag sa mga traffic enforcer kun kini masikop tungod kay mao kini ang hinungdan nga manikas ang pipila ka otoridad sa trapiko.
Sa samang higayon mihangyo si Comendador sa mga drayber nga likayan gyud nang paglapas sa balaod sa trapiko aron dili sila panguwartahon sa taga Citom. (BANATNEWS)
- Latest
- Trending
