Lalaki gipatay sa iyang balay

CEBU, Philippines - Patay nang miabot sa tambalanan ang usa ka lalaki human kini gisaka sa ilang panimalay ug gipusil sa silingan diha sa Zone 3 sa Mantuyong dakbayan sa Mandaue sa milabay'ng gabii.

 Ang biktima mao si Leopoldo Mapait Jr., 32, residente sa maong dapit samtang ang gitumbok nga mipusil mao si Alex Sultan alyas Aniwal nga residente usab sa maong dapit.

 Base sa pasiunang imbestigasyon ni PO3 Carlos Zapanta sa Station 1 sa MCPO nasayran base sa pamahayag sa asawa sa biktima nga si Armelyn nga kalit lang miabot si Sultan nga nagdala og armas ug pagkakita kang Mapait kalit kining gipusil tulo ka higayon sa dughan ug daling miikyas.

 Gidali og dala sa mga kabanay si Mapait apan gideklarar kining patay na sa mananambal pag-abot sa Mandaue City District Hospital.

 Ang kapolisan sa MCPO padayon pang nag-imbestigar sa maong kaso diin usa sa anggulo nga ilang gisubay mao ang kalambigitan sa illegal nga drugas nga miresulta sa maong krimen.

 Sa pagsusi sa kapolisan sa panimalay ni Sultan wala na kini sa maong dapit ug posibleng nagtagotago na kini gumikan sa salaod nga iyang nahimo. (BANATNEWS)