Chiong mikiha'g libel sa mama sa biktimang Dumpit

CEBU, Philippines - Si Crusade Against Violence (CAV) national Vice president Thelma Chiong mitinuod sa iyang bahad nga mopasaka og kasong libelo batok sa inahan sa biktima sa kontrobersiyal nga polis sa siyudad sa Sugbu nga si SPO1 Adonis Dumpit.

 Ang gipasakaan og kasong libelo ni Chiong ngadto sa buhatan ni Cebu City Prosecutor Nicolas Sellon mao si Janeth Badana, nagpuyo sa Villagonzalo II barangay Tejero ug inahan sa giingong gipusil patay ni Dumpit nga si Ronron Go. Sigon pa ni Chiong sa iyang tulo ka pahinang complaint affidavit nga niadtong Pebrero 15 ning tuiga, si Janeth Badana nagpa-interbyu sa DySS ug mitumbok nga giingnan siya ni Chiong nga “magpabayad na lang ka sa kaso ni Dumpit.”

Matud pa ni Chiong, kansang duha ka anak nga babaye nabiktima usab sa usa ka linoog nga krimen ug gipatay, dakong bakakon si Badana sanglit wala siya mobuhi og ingon nianang pamahayag.

Si Chiong nagkanayon nga ang mga pamahayag ni Badana nakaguba sa iyang reputasyon isip crusader batok sa mga krimen dili lamang dinhi sa Sugbu sanglit napatik sa pamantalaan ang pasangil ni Badana.

 Giklaro ni Chiong nga niadtong miduol sa iyang buhatan si Badana misumbong kining may mga tawong mitanyag nga magpabayad na lamang ug isibog ang kaso batok kang Dumpit apan iya kining giingnan nga “anaa ra nimo kun magpabayad ka.”

 Si Badana nakapangayo na og pasaylo pinaagi gihapon sa media sa iyang akusasyon kang Chiong apan alang kang Chiong dili pa kini paigo.

 “I was tensed and was so nervous for days and felt depressed. Foregiveness is easy to give, but can it restore my reputation?” pangutana pa ni Chiong sa panapos sa iyang affidavit. (Chester Abadilla)   (BANATNEWS)