Tomas O. gihagit ni Sepulveda

CEBU, Philippines - Gihagit sa tigpamaba sa Kapitolyo nga si Atty. Rory Jon Sepulveda si Cebu City Mayor Tomas Osmeña sa pagpadayon sa bahad niining pagbutang og billboard sa Ramos Public Market nga may dagway ni kanhi mayor Alvin Garcia ug Gob. Gwendolyn Garcia.

 Ang rason sa mayor base sa nanggawas nga report kini aron ipahinumdom sa katawhan nga si Alvin Garcia maoy hinungdan nga giguba ang maong merkado publiko ug wala mahuman ang pagpatukod sa bag-ong merkado.

Samtang si Gob. Garcia maoy mibabag sa mga proyekto alang sa kaugmaran sa South Road Properties kon SRP.

Sumala pa ni Sepulveda nga ang pagahimuon sa mayor dili makaapektar sa kandidatura sa gobernador kay dili man kini kandidato sa siyudad, apan iyang gihulagway nga usa kini matang sa pagpanamastamas sa pagkatawo sa gobernadora.

Matud pa ni Sepulveda nga dili magpanuko sa paghimo og legal nga lakang ang gobernadora sanglit daghang miyembro sa pamilyang Garcia ang mga abogado.

Usa na niini ang mismong anak sa gobernador nga si Atty. Maria Garcia, ang iyang mga igsuon ug ang iyang amahan nga si Kongresista Pablo Garcia sa ikaduhang distrito.

Dugang pa ni Sepulveda nga ang gobernadora wala mahadlok sa bahad sa mayor kay siguradong motinuod sila sa ilang paghimo og legal nga lakang batok sa mayor. (Chester Abadilla)    (BANATNEWS)