Oratio Imperata gipagawas sa simbahan

CEBU, Philippines - Gipagawas na sa Artsidiyosisi sa Sugbu ang pag-ampo alang sa nasinating El Niño Phenomenon kagahapon diin nakaapekto na sa mga mag-uuma ug sa kinatibuk-an dili lang dinhi sa Sugbu kundili sa tibuok nasud.

Ang Oratio Imperata litukon matag Santos nga Misa human sa pag-ampo sa pangalawat sa tanang simbahan dinhi sa lalawigan nga nag-ingon:

“ O Ginoong Dios, diha kanimo nabuhi, naglihok ug nagpuyo hatagi kami’g igong ulan, ug panalipdi kami sa tanang katalagman aron nga human matagbaw sa mga panabang dinhi sa yuta, mas malaumon kaming manginahanglan sa mga hinabang gikan sa langit padulong sa among paglakaw nganha sa kinabuhing dayon. Pinaagi ni Kristo among Ginoo, Amen. Senyor Santo Niño de Cebu, kaloy-i kami! Birhen sa Guadalupe de Cebu, i-ampo mo kami! Beato Pedro Calungsod, i-ampo mo kami!”

Ang Oratio Imperata buhaton sa Simbahan matag dunay mga katalagman ug uban pang mga pangamuyo nga diin gikinahanglan sa tumutuo. Naglakip na niini mao ang pag-ampo sa kalinaw, paglikay sa mga makatakod nga mga sakit ug uban pa.

Gawas sa Oratio Imperata, dunay mga okasyong litukon usab sa Santos nga Misa matag Domingo ug Biyernes ang karaang Gozos ni Sr. Santo Niño ilabi na panahon sa tinghuwaw, mahimo usab kining awiton.

Kagahapon sa buntag, nakasinati ang pipila ka mga dapit dinhi sa lalawigan ug pag-ulan nga nabatyagan sa Metro Cebu bisan paman sa grabeng kainit. (Edwin Ian Melecio)   (BANATNEWS)