Motor vs. traysikol 1 patay

CEBU, Philippines - Patay ang drayber sa habal-habal ug kritikal usab ang kahimtang sa drayber sa traysikol human magkadinasmagay sa National Highway sa Poblacion lungsod sa Liloan niadtong Domingo sa alas 12:05 sa sayong kaadlawon.

Ang patay paghiabot sa tambalanan mao si Micheal Delumbar, 32, molupyo sa barangay Jubay, Liloan, samtang ang drayber sa traysikol mao si Antonio Bihag, 60, minyo ug taga sitio Suba Poblacion, Liloan.

Matud pa ni PO3 Raul Flores sa Liloan Police dihang nahinabi sa Banat News, ang habal-habal nagsunod sa pasaheroang traysikol paingon sa siyudad sa Danao niadtong tungura.

Apan pag-abot sa maong lugar kalit nga miliko ang maong traysikol ug wala makabantay si Delumbar sa gibuhat sa traysikol ug naatrasawo na paghunong hinungdan nga nadasmagan niya kini.

Tungod sa kakusog sa pagkadasmag ni Delumbar nalagpot kini ug nabagnos ang ulo sa sementadong karsada samtang nalimbuwad usab ang drayber sa traysikol ug pulos naangol, apan dangtan og pipila ka gutlo namatay gyud ang habal-habal drayber.

Samtang ang drayber sa traysikol nagpabilin karun sa tambalanan tungod usab sa seryusong kadaot nga naangkon sa kalawasan niini. (Darrel Carumba)   (BANATNEWS)