CEBU, Philippines - Ang mga miyembro sa Integrated Bar of the Philippines Cebu Chapter ug Comelec mipasiugda paglusad og kampanya batok sa mga ilegal nga mga election materials kagahapon sa udto.
Ang kampanya nag-ulohan “Tugkaran mo Hinluan” mihimo og kasabutan tali sa mga asosasyon sa mga abogado, environmental lawyers pinangulohan ni Atty. Benhamin Cabrido ug Atty. Gloria Estenzo Ramos, simbahan pinaagi sa Dilaab Foundation pinangulohan ni Fr. Carmelo Diola, mga sakop sa Kapisanan ng mga Brodkaster sa Pilipinas Cebu Chapter pinangulohan ni Carlo Dugaduga, mga estudyante ug ubang mga sektor.
Ang maong kalihukan nagtinguha paglimpyo sa mga tugkaran sa mga kabalayan ug mga edipisyo gikan sa mga illegal campaign materials nga gipamutang sa gidiling mga dapit.
Sumala pa ni Ramos nga sugod karong semanaha sugdan ang ilang mga kalihukan nga pagpanglaksi ug pagtangtang sa mga election materials nga gipapilit ug gibutang sa mga lugar nga dili common poster areas, pagbadlong ug pagdakop sa mga walay disiplinang mga tawo sa mga kandidato nga magpasagad og papilit og mga election materials ug ang pagpasaka og kaso kanila.
Matud pa ni Ramos nga mopasaka usab sila og kasong disqualification sa mga kandidato nga nagpaplit og materyales nga wala sa lugar kun dili gyud kini mopatuo sa ilang ipang-isyu nga notisiya sa dili pa sila mopasaka og tukmang legal nga lakang.
Dugang pa niini nga tinguha nilang malimpyohan ang mga kabalayan, mga edepisyo ug ang mga kakahuyan gikan sa mga election material sa mga kandidato. (Chester Abadilla) (BANATNEWS)