2 ka lungsod bantayanan sa Mayo - Comelec

CEBU, Philippines - Duha ka lungsod ug usa ka siyudad ang gitan-aw karun sa Comelec nga posibleng ilang ibutang sa election watchlist karung eleksyon sa buwan sa Mayo.

Si provincial Comelec supervisor Atty. Marco Castillano nga nahinabi sa mga tigbalita kagahapon mitug-an nga ang siyudad sa Bogo maoy usa sa ilang gitan-aw’ng posibleng mabutang sa listahan tungod sa bag-ong desisyon sa Korte Suprema nga midaog si Celestino "Tining" Martinez III batok kang Rep. Benhur Salimbangon sa milabay’ng eleksyon niadtong 2007.

Hinuon mitataw si Castillano nga karun pang bulan sa Abril ang katapusan nilang conference uban sa kapolisan ug militar diin anha na mahibaw-an kung unsang mga lugara ang ilang ibutang sa election watchlist.

Samtang ang lungsod sa Ronda sa ikaduhang distrito ug ang lungsod sa Tuburan maoy iyahang giplanuhang ibutang gihapon sa maong listahan tungod sa kainit sa panagribal sa politika sa lokal nga mga kandidato.

Ang gipasabot niini sa Ronda mao ang panag-atbang sa pamilyang Sia ug Blanco nga diin magsangka ang igsuon ni Mayor Esteban Sia nga si Linda Villanueva ug ang bise mayor nga si Nonie Blanco.

Sa Tuburan, dili hinuon kaayo init ang politika apan tungod sa kagamay sa mga polis ug daghang voting centers nagkinahanglan gyud og dugang augmentation ang maong lungsod.

Matud ni Castillano nga tulo ka adlaw sa dili pa ang piniliay sa Mayo 10 duna na siya’y ipadalang mga sakop sa sundalo ug polis aron dunay makabantay sa mga voting centers nga   nahimutang sa bukirang lugar sa maong lungsod.

Si Castillano dihang gikuhaan og reaksyon kabahin sa nahitabong pagpangrakrak sa panimalay sa sakop sa City of Bogo Anti Crime Task Force (CBACTF) niadtong Domingo sa kaadlawon nagkanayon nga wala maestablisar ang hitabo kun politically motivated ba kadto.   (BANATNEWS)