Tanod nanion og pusil

CEBU, Philippines - Gitakdang imbistigahon sa kapolisan sa Talisay ang usa ka tanod sa barangay Pooc, sa maong dakbayan kay nanion kuno kini og armas ngadto sa usa ka trabahante sa maong lugar sa miaging adlaw.

Ang biktima nga hapit makuyapi sa kakuyaw ug nagkurog nga mitug-an sa kapolisan mao si Alexander Duluguin, 25, kawani sa Rodchris Enterprises sa barangay Pooc.

Gihinganlan niya ang maong tanod nga si Kit kinsa sinaw kuno kaayo og revolver nga maoy gition kaniya.

Gibutyag sa biktima nga nagsakay siya og bisekleta dihang samtang nagpadagan siya kalit lang mibutho si Kit ug gibabagan ang iyang agianan ug sa walay igong rason milanit kini sa iyang revolver ug dayon gition kaniya.

Gumikan sa kakuyaw nga mabalbag ang iyang bagolbagol niadtong tungora wala siya'y laing nahimo gawas sa pagsumbong ngadto sa kapolisan sa maong dakbayan.

Gisaaran siya sa kapolisan nga imbistigahon niini ang nashisgutang tanod.

Samtang ang mga tigpaniid nagkanayon kun tinuod kining hitaboa peligro kaayo kun padad-on og armas sa gobyerno ang mga tanod nga barumbado kay daghan kaayong madisgrasyang kinabuhi sa ubang tawo.

Samtang nadawat usab sa kapolisan ang usa ka submachine pistol nga gitahan sa ginganlan og Bobby Baltazar sa barangay Lagtang niadtong Sabado sa gabii.

Matud pa ni Baltazar nga ang maong armas iyang nailog gikan sa usa ka giila nga Barlsio nga taga Lawaan 3, sa maong dakbayan kinsa gipangita pa sa kapolisan.

Ang mga polis nga ubos sa Field Training Program (FTP) nga sila si PO1 Gary Lou Dealagdon, PO1 Manolito Daal, PO1 Lendy Martin Villagonzalo ug PO1 Cleofas Bonjoc Jr. maoy giduol ni Baltazar ug gitugyanan sa maong armas. - BANAT NEWS