Nanisko giluba naangol

CEBU, Philippines - Naangol ang usa ka bayongbayong human kini dunggaba sa iyang kadumot sulod sa diskohan didto sa sitio Cantecson, barangay Gairan siyudad sa Bogo niadtong Biyernes sa gabii.

Ang biktima giila lang sa ngalang Pat, 15, nga taga barangay Santo Niño, dakbayan sa Bogo, samtang ang suspek mao si Cesar Gomez, 18, nga silingan sa biktima.

Si PO3 Allan Dosdos, imbistigador sa Bogo City Police Station mibutyag sa Banat News nga ang biktima ug ang suspek pulos nanayaw sa disko apan sa kalit lang giduol sa suspek ang biktima ug sa way daghang estorya milanit sa iyang kutsilyo ug gihansak sa tiyan sa biktima.

Dihang nalup-og na ang biktima, mialibwag og panagan ang katawhan busa gihatod dayon kini ngadto sa Vicente Sotto Memorial Medical Center (VSMMC) dinhi sa dakbayan sa Sugbo.

Samtang ang suspek boluntaryong mitahan sa iyang kaugalingon ngadto sa kapolisan ug nagtingkagol na karon sa prisohan human kapasakai og kaso.

Nasuta sa imbistigasyon sa kapolisan nga karaang panagdumot ang motibo sa pagpanunggab.

Kini tungod kay ang manghod kuno sa suspek gikulata ug gigapos usab diay sa biktima sa milabay nga mga adlaw busa nanimawos ang suspek ngadto sa biktima. - BANAT NEWS